結左婚一個禮拜，係時候總結一下。回想婚禮當日，心入面嘅感覺主要都係感動同感激：

首先當然要多謝阿 Jo 肯俾我搞到咁大、咁體面。雖然大家都駛左好多錢，但係我相信依 D memories 係值回票價嘅！

之後要多謝外父外母不遠千里而來，仲喺「唔知頭唔知路」嘅情況之下全情投入去參與！外父講「掌上明珠」個 speech 亦講得好精彩！好令人感動啊！

仲要多謝阿姨姨丈盡地主之誼，飾演好 host 嘅角色。

多謝阿婆 (同阿公) 對介指，我會一路戴住，將來傳俾 D 仔女。

鳴謝黃沛榮先生送出龍鳳鈪乙隻。同時多謝阿媽玉成其美事。

多謝舅父特登去買件飲衫做其「舅公老爺」！

多謝一班兄弟！冇左你地幫手，出錢出力，真係死得人多。我會好珍惜大家嘅一份友誼，係錢買唔到嘅！有好多人會認為朋友嘅存在係為左互相利用。我就覺得如果大家都唔自私，一人出一分力，就可以發揮好大好大嘅力量，而且唔只係物質上嘅，仲係精神上嘅互相支持、互相靠依。正如我同你地講過，兄弟同心、其利斷金！如果大家目標正當，互相包容，盡量發揮每個人性格同能力上嘅優點，我地可以係一個好好好好好強嘅團隊！可以一齊貢獻社會同人類。

多謝劉生劉太及李生李太多年嚟嘅關照，亦好高興你地能在席上。

多謝萬子嘅一眾女子組 Bonnie、Alda、Carol 幾位好姊妹，匿埋喺個廁所度幫我計數，又要幫手「攝」位，無言感激，銘記於心。多謝 Ada 教我地跳舞…… 雖然最終隻舞都冇跳到。

多謝廿一世紀 EQ 之王基基。你做「總統」依個位，協調我班麻麻煩煩嘅兄弟，做得非常出色！

多謝 Ven 仔師姐幫我地忙足兩日。你以後幾時想飲咖啡，隨時出聲，我一定諗辦法滿足你！

多謝靴文井同學嘅專業演出，令到本來平平無奇嘅 rundown 變得豐富多采。

多謝莊友 Thomas 訓身演出；隻 bridal march 真係 pro 到爆！部琴真係型到爆！

多謝 Venus、Bern、基基、高佬幫我地影左輯又靚又自然嘅結婚相 & video。高佬：你 D shot 真係仲靚過平時拍節目！！多謝銘爺剪嘅 mv，奇靚無比！

多謝吉吉隻多用途公仔兼介指盒，同埋塊 foam-board！阿吉出品，必屬佳品。快 D 幫 Brian 整番件…… 你睇佢抱住小小 Ben 嗰時個表情，簡直父愛爆棚！！

多謝 Edward 散席時出手相助！

多謝各位姊妹照顧阿 Jo，令佢冇踩裙仆死到；and 多謝各位姊妹喺接新娘時手下留情！

多謝各位港台同事 especially 身負「台慶劇」重任嘅 Brian、羅華，仲有各位 ETV 人、老闆們、咁多位大佬 including 關大哥、Ben 哥、Ben 嫂 & 小小 Ben。仲有咁多位趕出街都嚟捧場嘅鏗鏘同事！我應承左馬占威嘅！欠左你地！搵日同你地飲番！

多謝六號啞晒都趕嚟。放心，我地全部都睇到你上電視！  ;)

多謝玫記中小學嘅同學仔、老師們。多謝你地嚟分享我嘅喜悅！

多謝 New Media 嘅老師同學們，特別係特登由深圳落嚟飲嘅 Leo 同學，同趕到飛起都要嚟一嚟嘅 Michelle 同學。

多謝HKU Katso 嘅莊友們及龍巷嘅兄弟們，當日好混亂，冇時間同你地詳談，唔好意思，希望你地都食得開心、玩得開心。

多謝拳會咁多位師兄師姐、師叔師伯，多謝你地，令氣氛好 HIGH！！

多謝由細睇到我大嘅一班 auntie、uncle。希望你地都飲得開心。

多謝因為有事冇嚟嘅親戚朋友同事們。我地好快又會再見！

如果我仲漏左邊個嘅話，願主祝福佢。又或者我漏左邊個我冇請而你又覺得我應該請你的話，講句 sorry先。請 call 我，我一定請番你食飯 (不過你都要做番人情 bor… heehee)。

在家靠父母，出外靠朋友。好榮幸認識你地咁多位。

最後，我想講一句：我多謝 ----- 聯邦！